2Cor 2 | NAS | STEP | Tee tee napoꞌ kemuꞌkanaꞌ diiꞌ orarunsi-antarampima beeroꞌkoo kasiamparuuꞌnung.

2 Corinthians 2

1 Tee tee napoꞌ kemuꞌkanaꞌ diiꞌ orarunsi-antarampima beeroꞌkoo kasiamparuuꞌnung. 2 Aiꞌ diiꞌ orarunsi-antarampiko deekoꞌ ning baie napoꞌ dotu-antamupeuꞌ? Otoaꞌ. Tee tee diiꞌke deekoꞌ ninge orarunsi-antarampiaruko dotu-antameripeuꞌ. 3 Teeꞌkoo ninge tee tutunaꞌnung karavoto diiꞌanko daariantuꞌnung diiꞌanko tamung mora diiꞌ orarunsi-antarampiarooꞌnaang, diiꞌ ning dotu-anta-koo narung-koo makosinuka-pinaꞌ noruꞌdampimaing. Aiꞌ ninge eeꞌ noruꞌdampiruꞌnung, ookara kapooꞌ koomparako deekoꞌ dotumari diiꞌanko meaing, eeꞌnoko ning dotumarako diiꞌ ookara doturariai nariꞌ. 4 Koontoꞌ sisikeera ninka domang mankiꞌmoi daarirerompiruꞌnung taꞌdue duuꞌmarama. Diiꞌ mankiꞌanta-koo deeaꞌ, teka diiꞌke ninge piaae maantoꞌmui piaarampimanaꞌ noruꞌeriiꞌnaang.

Paulaꞌke Nauvuruꞌnaꞌ Naning Orakaꞌ Nkoaruꞌnung Tontaꞌantaevaavaꞌnaang

5 Teka teie naninge tee orarunsi-anta basi-antavuuꞌnunge ning narung orarunsi-antamuaꞌ, teka diiꞌ ninka nariꞌ orarunsi-antamuruꞌnung, teka aaꞌpamaang, diiꞌ ookara nariꞌ orarunsi-antaruriaꞌ, kara baruꞌ mankiꞌ minkuamiꞌneeng-koo. 6 Diiꞌkoo mmauꞌke kiimata averuꞌnung makosinaꞌ tee naning. 7 Teeꞌkoo enang tee diiꞌke bereꞌdarima tontaꞌantaverima domang kuaaꞌantaveriaing, baruꞌ mankiꞌoraiꞌnange orarunsie booniꞌuꞌneeng. 8 Teeꞌkoo ning diiꞌkoo eentamarang piaa nau-antaveriiꞌnaang tee. 9 Tee tero tautaurampiri daarirerompiruꞌnung tee diiꞌ paara-anta-koo diiꞌ ookara kara arooꞌnuka masikeng deekoꞌ siraꞌdariiꞌnaang. 10 Enang tee baa naning diiꞌke tontaꞌantavering ninge teie teeꞌ tontaꞌantavansinge. Aꞌnooꞌ tee kapooꞌ ninge tee tontaꞌantavansing tee ning-aape nkovuaꞌ, tamung diiꞌ pakurampiri tontaꞌantavansing Karistooꞌkoo uroꞌkanooꞌke. 11 Teeꞌ nkomarima tee Sietaniꞌ doona avompiarooꞌnaang niiꞌ barang-koo, aiꞌ niiꞌ teing amakonanka deeaꞌ tee maroaramanaꞌ tasiꞌkoo.

Kara Okovuri Nkanuka Kumponing Ninka Purimpariri Kara Berempaamanaꞌ

12 Tenang ning Toroasi-navuntuꞌkoo basimarama tee doorenang Karistooꞌ bakaang daankiama doona ning-koo daateꞌari otoko ooantuꞌ tee Ovoring bakaang nko-nko nko-koo. 13 Nka nkaang noruꞌ baruꞌ tampaꞌ oꞌnoaꞌ tee Taitas, mmaikoꞌ, teka ooamparura diiꞌkoong doorenang ninka mmeꞌ poaruko. Teeꞌkoo tee besiꞌama Toroasi-nupoong teka siparamira Masedoniaꞌnameensiꞌaape mouꞌ.

14 Teka tampara masikung tee-koo Kumponing, aiꞌ teie tee Karistooꞌkoo kuunge arooꞌantamurira siong-antamurimaung ookara batei-koo ookara kapooꞌ puruꞌuuꞌnaꞌ sirakuraꞌ oroꞌantavuma. Eeꞌnoko niiꞌkoo kuunge tee Karistooꞌ noruꞌkoong noruꞌ avitoitoi bereng-antavukooꞌ nuuraaꞌ tampaꞌ kaꞌmiꞌpinaꞌ. 15 Aiꞌ niiꞌ teing Karistooꞌkoong numponuponanka ookara nantoong-koo meuꞌke Kumponinge bamuruꞌnaꞌ; 16 Teing nantoong booꞌpariaing-koo tee niikaang doorenang tee orakaꞌ kaꞌmiꞌpinaꞌ nuu, eeꞌnoko teing-koo domampariaining-koo tee booꞌantanaꞌ nuuraaꞌ niikaang kara. Eeꞌnoko baa naning baka teeꞌ tampaꞌ nuuraaꞌarapeuꞌ Kumponing-koo taapoꞌke? 17 Aiꞌ niiꞌke tee Kumponing bakaang kara mooniꞌ nka-koo daankiampiaung niiꞌning nkoarimanaꞌ, teka niiꞌ nantoong arooꞌpoꞌnupoong masikeng, Kumponinge botomurioꞌ Kumponing-koo dutakanooꞌke Karistooꞌkoo kuunge karompimaung.